Kosova vijon të jetë pa një qeveri të re për shkak se Lëvizja Vetëvendosje dhe LDK nuk kanë arritur akoma një marrëveshje. Pengesë po bëhen pretendimet e partisë së Isa Mustafës për postin e presidentit, të cilat Vetëvendosja nuk i pranon dot.
Lidhur me ecurinë e diskutimeve për marrëveshje foli këtë të martë për “ABCNews” deputetja e Vetëvendosjes, Albulena Haxhiu, e cila ia bëri të qartë LDK se nëse nuk tërhiqet nga posti i presidentit, atëherë vendi do të shkojë në zgjedhje të jashtëzakonshme.
“Kemi përmbyllur çështjet programore dhe kemi bërë ndarjen në 12 ministri nga 21 që ishin, për shkak se ka pasur një tendencë për abuzime. 5 ministri do të drejtohen nga Lëvizja Vetëvendosje dhe 2 do të rezervohen për përfaqësuesit e komuniteteve jo shumicë në Kosovë.
Vullnetin që ka Vetëvendosje për të bërë koalicion duhet ta ketë edhe LDK. Koalicioni duhet të niset me mirëbesim ndërmjet të dyja palëve. Ne do të angazhohemi që ta jetësojmë vullnetin e qytetarëve, por nuk përjashtojmë edhe zgjedhjet e jashtëzakonshme në Republikën e Kosovës”, tha Albulena Haxhiu.
(M. I./ Faxweb.al)
Discussion about this post