Gazetari Ilir Ikonomi publikon bisedën interesante mes Mbretëreshës Geraldinë dhe Mbretit Zog, lidhur me fenë e tyre. E vetëdijshme për të sajën, katolike, Geraldina ia ka bërë të qartë Zogut se as nuk kishte ndërmend ta ndërronte. Por cila qe përgjigja e tij? Ndiqni dialogun, jo shumë të njohur për shqiptarët.
”Një foto e rrallë në Tiranë e konteshës hungareze Geraldine Appony, që do të bëhej më vonë Mbretëresha e Shqiptarëve.
Geraldina 22-vjeçare arriti në Shqipëri në fund të vitit 1937 dhe pas një njohjeje të shkurtër me Mbretin Zog, ditën e vitit të ri ai e pyeti:
– A thua se mund të më duash përgjithmonë, pavarësisht çfarë ndodh në jetën tonë?
– Po unë të dua tashmë, – u përgjigj ajo.
Pastaj ata folën për dallimet e tyre fetare.
– Unë do të të dua përgjithmonë, – tha Geraldina, – por ti je mysliman dhe unë katolike. Si do ta rregullojmë këtë punë? Asgjë në botë nuk mund të më detyrojë mua ta ndryshoj fenë. Ashtu siç shohim hënën dhe diellin, ashtu edhe unë kam fenë time dhe nuk mund ta ndryshoj.
Mbreti qeshi:
– Edhe unë e kam menduar këtë dhe nuk bëhet fjalë që ti të ndryshosh fenë. Ne jemi myslimanë europianë dhe unë kam shumë respekt për kishën tuaj. Falë Kishës Katolike dhe manastireve në Shqipëri ne ia arritëm ta mbajmë gjallë gjuhën tonë. Nën Perandorinë Osmane ishte e ndaluar të flisje shqip, vetëm turqishtja lejohej. Por nëpër manastire ishte ndryshe, prandaj ne u kemi atyre një borxh të madh që e mbajtën gjallë gjuhën tonë. A dëshiron ta mësosh shqipen?
– Më jep një mësues qysh nesër, – tha Geraldina”, shkruan Ikonomi.
Dialogu është marrë nga libri i Gwen Robyns “Geraldine of the Albanians”. (V.G/SHUPLAKA)
Discussion about this post