Do të vriste anëtarin e një prej klaneve mafioze më të rrezikshme, arrestohet shqiptari në Budva (Emri)

Shtetasi kosovar, Bajram Pista, 30 vjeç, është arrestuar para katër ditësh në Budvë, raporton gazeta malazese “Vijesti”. Gazeta shkruan se arrestimi është bërë nën dyshimin se Pista kishte shkuar në qytetin bregdetar malazias i ngarkuar për të vrarë anëtarin e njërës prej dy klaneve kriminale që janë në konflikt.

Policia e Budvës tha se personi synonte likuidimin e dikujt tjetër, që tani është shpëtuar.

Sipas gazetës “Vijesti” , hetuesit në Budva po kërkojnë kush ka qënë përkrahësi i Pistës, sepse disa persona kanë pasur kontakt me të dhe i kanë ofruar ndihmë logjistike.

“Punojmë intensivisht në zbardhjen e këtij rasti dhe mbledhjen e dëshmive që mbështesin dyshimin se Pista është angazhuar për të likuiduar një qytetar të Budvës, i cili, sipas evidencës sonë, është pjesëtar i njërit prej klaneve kriminale në konflikt”, ka thënë për “Vijesti” një burim policor.

Sipas gazetës, Pista është arrestuar më 29 prill, në një banesë në hyrje të Budvës. Thuhet se i arrestuari është nga Rahoveci, dhe se në momentin e arrestimit atij i janë gjetur edhe armë, municion, heroinë dhe një telefon i koduar.