Policia e Matit ka zbardhur dhe goditur një rast të qëllimshëm të dëmtimit të pronës, pas djegies së një automjeti në përdorim nga një 30-vjeçar, ngjarje e ndodhur në orët e para të mëngjesit të 1 qershorit 2025, në qytetin e Burrelit.
Si rezultat i hetimeve të thelluara dhe të shpejta, në kuadër të operacionit të koduar “Firemen”, shërbimet e Komisariatit të Policisë Mat identifikuan dy autorët e dyshuar të ngjarjes:
-
E. K. (H.), 24 vjeç, banues në fshatin Zenisht, i cili u arrestua;
-
J. S., 25 vjeç, banues në Burrel, për të cilin vijon puna për lokalizimin dhe kapjen.
Gjithashtu, në kuadër të këtij operacioni është proceduar penalisht në gjendje të lirë shtetasi R. K., 23 vjeç, banues në Burrel, i dyshuar për moskallëzim krimi.
Ngjarja kishte shkaktuar shqetësim te banorët e zonës, ndërsa falë reagimit të shpejtë dhe hetimeve të strukturuara, Policia bëri të mundur identifikimin e autorëve në një kohë të shkurtër.
Materialet procedurale i janë referuar Prokurorisë pranë Gjykatës së Shkallës së Parë Dibër, për veprime të mëtejshme ligjore.
Policia e Matit siguron qytetarët se do të vijojë punën për parandalimin dhe zbardhjen e ngjarjeve kriminale, si dhe për vendosjen përpara drejtësisë të autorëve të çdo vepre penale.
