Bindja Demokratike nga sot është partia më e re në vend, pas regjistrimit në Gjykatën Civile të Tiranës dhe në Komisionin Qendror të Zgjedhjeve.
Faxweb.al ka siguruar dhe emrat e anëtarëve të bordit drejtues të cilët janë: Arben Skënderi, Valbona Mezini, Fabian Topollaj, Astrit Patozi, Andi Përmeti dhe Leonard Olli, ndërsa koordinator i tij Astrit Patozi.
Ajo që bie në sy është fakti se përveç Andi Përmetit asnjë prej personave që janë zgjedhur në bordin drejtues nuk janë deputetë që kanë pranuar mandatet nga listat shumëemërore të KQZ-së.
Ndërkohë që lidhur me krijimin e partisë së re nga rebelët e PD-së, i pyetur nga mediat kryedemokrati Lulzim Basha tha se vendi nuk do mund të ketë një opozitë false.
Njoftimi i parë për mediat nga Bindja Demokratike;
Shqipëria do të ketë prej sot një parti opozitare më shumë. Bindja Demokratike dorëzoi paradite në gjykatën e Tiranës të gjithë dokumentacionin e regjistrimit si parti politike, shoqëruar me rreth 4 mijë rma mbështetësish për krijimin e saj.
Vendimi erdhi pas takimit të një grupi të madh nismëtarësh mbrëmjen e kaluar, ku u përcaktuan edhe hapat e para të kësaj organizate politike në rrugëtimin e saj. Nismëtarët vendosën të mandatojnë një bord të përkohshëm, i cili do të përfaqësojë partinë deri në ngritjen dhe zgjedhjen e forumeve drejtuese të saj, sipas statutit.
Anëtarë të këtij bordi do të jenë: Arben Skënderi, Valbona Mezini, Fabian Topollaj, Astrit Patozi, Andi Përmeti dhe Leonard Olli, ndërsa koordinator i tij Astrit Patozi. Po sot Bindja Demokratike dorëzoi në Komisionin Qëndror të Zgjedhjeve kërkesën për pjesëmarrje si subjekt politik në zgjedhjet vendore të 30 qershorit.
(E.K/FAXWEB.AL)
