Pep Guardiola do ta sfidojë sërish këtë të martë Real Madridin. Do të jetë përballja e 22-të e trajnerit katalanas ndaj “Los Blancos”. Megjithëse përmbysja e pabesueshme e sezonit të kaluar është ende në retinën e të gjithëve, e vërteta është se bilanci shkon në favor të trajnerit aktual të Manchester City, falë mbi të gjitha kohës së tij në pankinën e Barçës.
Ëndrra e Pep është të hakmerret për atë që ndodhi një vit më parë dhe të shkojë në finalen e 10 qershorit në Stamboll. Sezonin e kaluar, Real Madridi dhe Manchester City u ndeshën në gjysmëfinale të Ligës së Kampionëve.
Anglezët fituan në ndeshjen e parë (4-3) dhe po udhëhiqnin 1-0 në kthim, deri në minutën e 90-të, kur Rodrygo shënoi dy gola dhe e çoi lojën në kohën shtesë. Benzema siguroi pastaj kualifikimin nga një penallti.
Kjo nuk ishte përballja e vetme e Ligës së Kampionëve mes Real Madridit dhe Manchester City të Guardiolës. Ata u takuan edhe në 1/8 finale të sezonit 2019-2020. Anglezët fituan ndeshjen e parë në “Bernabéu” (1-2). Kompeticioni u ndërpre nga koronavirusi.
Ndeshja e kthimit u luajt në gusht, me fitoren e re të Manchester City (2-1). Gabriel Jesús ishte heroi, duke shënuar në të dyja ndeshjet dhe lënë Real Madridin jashtë “tetëshes” finaliste në Lisbonë. Manchester City u rrëzua në çerekfinale ndaj Lyonit.
Dy ndeshje të tjera kualifikuese të Champions League kanë përballur Real Madridin me trajnerin katalanas. Me Bayernin, në sezonin 2013-2014, skuadra e bardhë doli e favorshme, duke fituar të dyja ndeshjet. Fitorja në ndeshjen e dytë të luajtur në Mynih (0-4) ishte e rëndësishme.
Me Barçën fitoi Guardiola. Ndodhi në gjysmëfinalen e sezonit 2010-2011. Barça fitoi ndeshjen e parë në “Bernabéu” (0-2), me dy gola të Leo Messit, pas një beteje të ashpër mes vetë Guardiolës dhe José Mourinhos në dhomën e shtypit. Në ndeshjen e dytë u regjistrua barazimi. Barça e fitoi atë Champions League në “Wembley”, kundër Manchester United.
Në katër sezonet, kur Guardiola ishte në stolin e Barçës, skuadra e tij luajti deri në 15 herë ndaj Real Madridit me një rekord shumë të favorshëm për trajnerin katalanas prej 9 fitoresh, 4 barazimesh dhe vetëm dy humbjesh.
Ndër fitoret, përveç atyre të përmendura tashmë në Champions, kujtohen edhe dy mitike në La Liga: fitorja (2-6) në “Bernabéu”, në sezonin 2008-2009 për të vulosur titullin e La Liga-s, dhe fitorja 5-0 në sezonin 2010-2011, me një “hat-trick” të David Villa.
Gjithashtu nuk harrohet fitorja 3-2 në finalen e Superkupës së Spanjës, me gishtin e Mourinhos në syrin e Tito Vilanova dhe golin e Messit në minutën e fundit për t’ua dhënë trofeun katalanasve.
