Ambasadori amerikan Donald Lu mëngjesin e sotëm e ka nisur me takime politikanësh, ku ka biseduar lidhur me konfliktin me kryeprokurorin Adriatik Lalla. Në këtë takim, Lu është shprehur se verifikimi i vizës së kryeprokurorit ka qenë vendim i konsulatës dhe jo i tij, siç është shprehur më parë Lalla.
Sipas “Top Channel”, në këtë takim Lu është shprehur gjithashtu se Uashingtoni i ka kërkuar përfaqësisë në Tiranë që të verifikohen të dhënat edhe për gjyqtarë dhe prokurorë të tjerë.
“Ky ishte një urdhër dhe unë nuk kisha opsione ta zbatoja apo jo. Për njerëzit që u është hequr viza, kishte dyshime se qëllimi i tyre është të ikin nga Shqipëria bashkë me pasuritë e vëna nga korrupsioni, dhe në Shtetet e Bashkuara nuk e pranojnë këtë”, është shprehur Lu.
Sipas “TCH”, ambasadori ka diskutuar edhe me PD-në edhe me kryeministrin Rama, mbi cështjen e kontrollit nga qeveria të dy drejtorive kyçe që japin informacion për organet e “vetting”-ut, Drejtoria e Kontrollit të Figurës dhe ajo e Pastrimit të Parave. Kjo pikë është kundërshtuar me forcë nga opozita, ndërkohë që kryeministri është shprehur i gatshëm përballë Lu-së që të gjejë një zgjidhje.(D.D/Shuplaka)
