Ambasada e Shteteve të Bashkuara të Amerikës, ka reaguar pak minuta më parë për arritjen e marrëveshjes mes Edi Ramës dhe Lulzim Bashës për paketën “McAllister +”.
Donald Lu u thotë “Bravo” popullit shqiptar për durimin, Edi Ramës dhe Lulzim Bashës për udhëheqësinë dhe kurajon, si dhe faktorit ndërkombëtar për mbështetjen e palëkundur për Shqipërinë.
“Bravo popullit shqiptar për durimin dhe besimin e tij tek forca e demokracisë së Shqipërisë. Bravo Edi Ramës dhe Lulzim Bashës për udhëheqësinë dhe kurajon personale në farkëtimin e kësaj marrëveshje. Bravo kolegëve nga Bashkimi Europian, OSBE dhe Uashingtoni për mbështetjen e tyre të palëkundur për Shqipërinë. Presim me kënaqësi e padurim zgjedhjet me pjesëmarrjen e të gjitha partive politike të Shqipërisë. Donald Lu”, shkruhet në reagimin e ambasadës amerikane.
Ambasadori Donald Lu ka zhvilluar takime të shpeshta kokë më kokë me kryedemokratin Basha dhe kryeministrin Rama gjatë gjithë krizës politike. Jo më larg se dje, ai qëndroi rreth dy orë në takim me Bashën dhe më pas rreth 20 minuta me Ramën.
(XH.A/SHUPLAKA)
