Donald Trump shkeli një traditë pothuajse 20-vjeçare duke mos shtruar darkën e iftarit, një event i organizuar nga Shtëpia e Bardhë që prej kohës kur në krye të saj ka qenë Bill Clinton.
Sekretari i Shtetit, Rex Tillerson thuhet të ketë refuzuar kërkesën e organizimit të një pritjeje. Në muajin mars, “Reuters” pat raportuar se Tillerson e kishte hedhur poshtë rekomandimin e zyrës së DASH për fenë dhe çështjet globale që të zhvillohej një lloj kremtimi me rastin e festës muslimane.
Trump njihet për retorikat e tij anti-islamike dhe gjatë fushatës pat bërë thirrje për mbikëqyrjen e të gjitha xhamive në Shtetet e Bashkuara. Megjithatë, ai nuk la pa e nxjerrë një deklaratë ku i përcillte urimet e veta besimtarëve që kremtojnë Fiter Bajramin.
Gjatë kësaj feste, shkruante Trump, na kujtohet rëndësia e mëshires, dhembshurisë dhe dashamirësisë. “Me të gjithë muslimanët anekënd botës, Shtetet e Bashkuara e ripërtërijnë angazhimin e tyre për t’i respektuar vlera të tilla. “Eid Mubarak” – gëzuar Fiter Bajramin – përfundon mesazhi i presidentit.
Tillerson gjithashtu nxorri një deklaratë të shkurtër ku i uronte të gjithë muslimanët që e festojne këtë ditë të shënuar në kalendarin islamik dhe vetëm kaq. Darkën e iftarit në Shtëpinë e Bardhë e kanë organizuar rregullisht tre presidentët e fundit, përfshirë Barack Obamën.
Por i pari që ka shtruar një pritje të tillë ka qenë Thomas Jefferson në 1805-n, i cili u përpoq të nderonte në këtë mënyrë një të dërguar tunizian. Traditën e risolli në kohët e sotme Hillary Clinton, në 1996-n, në kohën kur ishte ishte zonjë e parë e vendit.
(E.K/SHUPLAKA)
