Presidenti i Shteteve të Bashkuara të Amerikës, Donald Trump, përmes zëvendësdrejtorit të Lartë për Evropën në Këshillin e Sigurisë Kombëtare (NSC) John Erath, dhe Drejtorin i NSC-së për Çështjet Evropiane, Brad Berkley i ka ridërguar thirrjen klasës politike të Kosovës për kthimin në binarë të dialogut me Serbinë.
Këtë deklaratë e ka bërë publike Ambasada e SHBA-ve në Prishtinë, ku thekson se takimi i përfaqësuesve të lartë amerikan me krerët e politikës kosovare dhe asaj serbe, kishte në thelb transmetimin e porosisë së Presidentit Amerikan, “për të zënë këtë moment unik … dhe për t’u përmbajtur nga veprimet që do ta bënin arritjen e një marrëveshjeje më të vështirë”.
Deklarata e plotë e ambasadës:
Zëvendësdrejtori i Lartë për Evropë i Këshillit të Sigurisë Kombëtare (NSC) John Erath, dhe Drejtori i NSC-së për Çështje Evropiane, Brad Berkley, u takuan dje me Presidentin Thaçi dhe Kryeministrin Haradinaj, pas vizitës në Beograd dhe takimeve me udhëheqësit e qeverisë së Serbisë.
Zyrtarët erdhën për të përforcuar porosinë e Presidentit Trump “për të zënë këtë moment unik … dhe për t’u përmbajtur nga veprimet që do ta bënin arritjen e një marrëveshjeje më të vështirë”. Në të dyja kryeqytetet ata theksuan shqetësimin e Shtëpisë së Bardhë se Dialogu duhet kthyer në binarë, dhe se të dyja palët duhet të ndërpresin veprimet provokuese dhe të ndërmarrin hapa konstruktivë për tu kthyer në tryezën negociuese.
Zyrtarët përsëritën mesazhin e tyre nga letra ndërinstitucionale e 11 shkurtit se taksat në prodhimet e Serbisë dhe Bosnies janë pengesë në rrugën drejtë progresit, e minojnë partneritetin tonë, dhe duhet të pezullohen në mënyrë që Dialogu me Serbinë të lëvizë përpara. Ata theksuan urgjencën që Kosova të arrijë një marrëveshje gjithëpërfshirëse të normalizimit me Serbinë, dhe rreshtimin SHBA-Kosovë për këtë interes të përbashkët strategjik.
(F.GJ/FAXWEB.AL)
Discussion about this post