Në SHBA vijojnë lëkundjet pas zëvendësimit të Tillerson.
Duket se Donald Trump nuk do të mjaftohet me kaq pasi raportohet se ka vendosur të zëvendësojë Këshilltarin e tij të Sigurimit Kombëtar McMaster, sipas shtypit amerikan. Njoftimin e dha fillimisht gazeta “Washington Post” dhe më pas u konfirmua edhe nga rrjeti CNN.
Sipas gazetës “Washington Post”, presidenti e ka marrë tashmë vendimin dhe ka filluar të kërkojë për kandidatë të mundshëm për zëvendësimin e tij. Sipas gazetës, presidenti është i bindur për ta larguar gjeneralin McMaster, me të cilin ai nuk ka patur marrëdhënie të mira, por nuk do të nxitojë në shpalljen e vendimit për të mos e vënë në pozitë ish gjeneralin me tre yje dhe për të gjetur një kandidat të fortë për zëvendësimin e tij.
Dy prej emrave të mundshëm, që gazeta Ëashington Post përmend për zëvendësimin e gjeneralit McMaster, janë John Bolton, ish ambasador në OKB dhe Keith Kellogg, shefi i tanishëm i personelit të Këshillit të Sigurimit Kombëtar.
Pas shkarkimit të Sekretarit të Shtetit Rex Tillerson, ka patur zëra të shumtë se zyrtarë të tjerë të lartë të administratës së presidentit Trump do të zëvendësoheshin.
Të enjten, duke folur me gazetarët, presidenti Trump la të kuptohej se priten ndryshime të tjera: “Gjithmonë do të ketë ndryshime. Besoj se edhe ju doni të shihni ndryshime. Unë dua të shoh mendime të ndryshme”.
(E.K/FAXWEB)
https://www.washingtonpost.com/politics/trump-decides-to-remove-national-security-adviser-and-others-may-follow/2018/03/15/fea2ebae-285c-11e8-bc72-077aa4dab9ef_story.html?hpid=hp_hp-top-table-main_trumpchaos-915pm%3Ahomepage%2Fstory&utm_term=.dcbd948f1241
