GJKKO ka shpallur fajtor në mungesë Domart Konjarin, duke e dënuar me 15 vite heqje lirie. Konjari është akuzuar dhe gjetur fajtor për veprat penale ‘trafik droge’, pjesëmarrje në organizatë kriminale, pastrim parash, falsifikim dokumentesh e tentativë për të korruptuar policinë.
Konjari është gjykuar në mungesë. Në vitin 2016 ai u kthyer në mollë sherri mes Shqipërisë dhe Francës, pasi në Francë ai kërkohej për trafik kokaine në disa episode.
Ai u paraqit në kufi me pasaportën false me emrin Arben Lazri, pas konfirmimit ai u arrestua, por një vendim gjyqësor e liroi dhe Konjari u arratis.
Në dosjen që Krimet e Rënda kanë marrë nga autoritetet franceze, renditen me detaje të gjitha veprimtaritë e Konjarit në Shqipëri, Francë, Holandë, Belgjikë, Spanjë, Itali dhe Gjermani.
Konjari dyshohet se drejtonte rrjetin e trafikut të kokainës, pasi mendohet se ka lidhje direkte me burimin e prodhimit të saj në Amerikën e Jugut. Si pasojë e këtij rrjeti, influencës në treg dhe shpërndarjes së drogës në Europë, hetuesit francezë thonë se kanë ndodhur edhe disa vrasje, ku në dy raste, 42-vjeçari Konjari u ka shpëtuar atentateve me armë.
Në dosje, emri i Konjarit përmendet si i përfshirë direkt ose indirekt në disa vrasje për trafikun e drogës. Aty përmendet vrasja e 29 gushtit të vitit 1998, kur është ekzekutuar Gentian Dervishi, i njohur ndryshe me nofkën “Gent Kadaifi”.
Vrasja ndodhi pranë “Shkollës së Kuqe”, në Tiranë. Më pas, emri i Konjarit del në vrasjen e ndodhur në vitin 2003, në qytetin Rene të Francës, ku u vra Erion Murati për një mosmarrëveshje për trafikun e drogës. Lista e atentateve ku dyshohet se ishte përfshirë Konjari, vijon me ngjarjen e 3 gushtit të vitit 2005 në Tiranë, ku u ekzekutua Fatjon Naxhaku. (E.K/Faxweb.al)
Discussion about this post