“Dorëzohet” Kodheli: Pas zgjedhjeve, më mirë një tjetër në krye të Ministrisë së Mbrojtjes

Është femra e parë ministre mbrojtjeje në historinë e Shqipërisë, por pas një fitore të mundshme të së majtës në zgjedhjet e 18 qershorit Mimi Kodheli nuk e sheh veten më në krye të dikasterit që drejton aktualisht.

“Të vinte dikush tjetër do të ishte më mire për t’i dhënë një tjetër hov rrugës së mirë në të cilën ndodhen Forcat e Armatosura dhe Ministria e Mbrojtjes shqiptare në tërësi”, u shpreh Kodheli në një intervistë për Top-Channel.

E pyetur nëse presidenca është një prej ambicieve të saj politike për të ardhmen, Kodheli përgjigjet me diplomaci.

“Ka shumë burra dhe gra në këtë vend që mund të jenë të denjë për postin e Presidentit të Republikës”, u shpreh ajo.

Kur jemi 6 muaj larg zgjedhjeve parlamentare partitë politike po mendojnë edhe për emrin e presidentit të ri, pasi Bujar Nishanit i mbaron mandati para zgjedhjeve. Deri tani asnjë prej palëve nuk ka dalë me emra konkretë. (A.R/SHUPLAKA)