Deputeti i Ballit Kombëtar Demokrat, Artur Roshi i ftuar në Fax News foli mbi propozimet e tij për një projektligj në lidhje me dëmshpërblimet e kohës së luftës.
Roshi ka propozuar një projektligj në Kuvend në lidhje me llogaritjen e masës së dëmshpërblimit ku për familjarët e viktimave, të pushkatuar pa gjyq, të pushkatuar apo ekzekutuar me dënim politik të padrejtë, të përfitojnë dëmshpërblimin financiar në masën e 25 viteve kompensim dënimi me burgim,me dënimin maksimal mbas faljes së jetës.
Një tjetër propozim është edhe ai që ish-të pëndjekurve të mos i llogaritet banesa që kanë marrë në përfitim.
“Unë kam dashur të përputh ligjin që ka të bëjë më statusin e ish-të përndjekurit politik, me ligjin. Së dyti të mos preken dëmshpërblimet bazike të ish-të përndjekurve politikë. Kuptohen bonot që ato kanë për xhepa akoma dhe nuk i kanë vënë në funksionim të privatizimeve të objketeve të ndryshme. Ish-të përndjekurit kanë përfituar banesa si shkolla apo konvikte që i kanë përshtatur si ambiente banesa dhe kanë kryer investime e tyre, duke i përshtatur dhe se nuk mund t’i zbritet si masë e përfitimit në momentin e llogaritjes së dëmshpërblimit. Kështu nuk mund ta llogarisë me çmimin e tregut godinën, pasi ish-të përndjekurit mund të kenë kryer investime përgjatë viteve. Pra nëse ai përfiton 50 mijë euro, nuk mund t’ia zbresësh në në 20 apo 30 mijë euro duke i llogaritur godinën e përfituar”, shprehet Roshi.
Për këtë ai propozon ndryshimin e nenit 6 duke propozuar se “Nga shuma që çdo i dënuar politik përfiton nga ky ligj, të mos zbritet masa e dëmshpërblimit që ai ka përfituar me ligjet e mëparshme”.
