Tre ditë pas betimit, vijojnë urimet për Presidentin e Ri të Republikës Ilir Meta. Këtë radhë është drejtuesi Ekzekutiv i Komitetit Hebreo-Amerikan (AJC), David Harris ai i cili i ka dërguar një mesazh urimi presidentit Meta.
Në mesazhin e tij Harris shprehet se marrëdhëniet mes Shqipërisë dhe SHBA-ve bazohen në vlera dhe interesa të përbashkëta strategjike dhe se Komiteti Hebreo-Amerikan nuk do ta harrojë kurrë kurajën e jashtëzakonshme morale të Shqipërisë, të mishëruar nën frymën e Besës, kur shpëtuan hebrenjtë gjatë Holokaustit.
MESAZHI I HARRIS:
“Po ju shkruajmë që t’ju shprehim urimet tona të përzemërta me rastin e fillimit të detyrës Suaj si President i Republikës së Shqipërisë. Marrëdhëniet mes Shqipërisë dhe Shteteve të Bashkuara të Amerikës bazohen në vlera dhe interesa të përbashkëta strategjike.
Dhe me të vërtetë, fjalimi juaj në Forumin Botëror të Komitetit Hebreo-Amerikan në vitin 2016 ishte një dëshmi e fortë e partneritetit të konsoliduar mes dy shteteve tona. Komiteti Hebreo-Amerikan nuk do ta harrojë kurrë kurajën e jashtëzakonshme morale të Shqipërisë, të mishëruar nën frymën e Besës, në saje të së cilës shpëtuat hebrenjtë gjatë Holokaustit, si dhe përkushtimin tuaj të përhershëm për të luftuar ekstremizmin dhe radikalizmin në botën e sotme.
E dimë fort mirë që nën udhëheqjen tuaj, lidhjet mes Shteteve të Bashkuara dhe Shqipërisë, si dhe ato mes Shqipërisë e Izraelit, do të vazhdojnë të lulëzojnë e t’u shërbejnë interesave të sigurisë ndërkombëtare si dhe të mbrojtjes së lirisë” (D.D/Shuplaka)
