Partia “Forca Rinia” e cila ka qenë e pranishme në tryezën e djeshme që kreu i PS-së, Edi Rama, zhvilloi me partitë aleate, hedh poshtë deklaratat e Petro Koçit, Idajet Beqirit dhe Gjergji Kojas, për arritje marrëveshje në atë tryezë.
Duke e cilësuar sjelljen e Partisë Socialiste si jo korrekte, kreu i FRA-së, Dritan Broka, shprehet se PS nuk iu përmbajt asnjë pike të marrëveshjes së mëparshme, ndërkohë që Rama u kërkon ndihmë aleatëve pasi i trembet rezultatit të ulët në këto zgjedhje.
“Theksojmë që nuk u arrit asnjë marrëveshje në atë tryezë, sikurse pretendojnë në një deklaratë për mediat z.Petro Koçi, z. Idajet Beqiri dhe z. Gjegji Koja, hedhim poshtë deklaratat e tyre. “Forca Rinia” vlerëson si jo korrekte sjelljet e Partisë Socialiste.
Ne vlerësojmë se Partia Socialiste nuk i është përmbajtur asnjë pike të marrëveshjeve të mëparshme, Partia Socialiste kërkon ndihmën e aleatëve vetëm atëherë kur janë në vështirësi dhe më pas hedhin poshtë aleatët. Pikërisht kësaj here Edi Rama i kërkoi ndihmë aleatëve sepse i trembet rezultatit të ulët në këto zgjedhje.
Kështu që për arsyet e mësipërme por edhe mospasjen e hapësirave për implementimin e idealeve e parimeve tona, “Forca Rinia” NUK i bashkohet Partisë Socialiste në zgjedhje. Disa nga parimet e përbashkëta që më parë çuan në realizimin e marrëveshjes politike midis “Forca Rinia” dhe Partisë Socialiste në zgjedhjet lokale, parime të cilat u premtuan dhe më pas nuk u realizuan nga Socialistët janë: Ndalimi i importit të plehrave( i realizuar dhe më pas i kthyer prapa) , ndalimi i koncesioneve dhe rishikimi i kontratave aktuale koncesionare, mos rritja e taksave, mbështetja e rinisë dhe punësimi i tyre.”, bën me dije partia “Forca Rinia” (FRA).
(XH.A/SHUPLAKA)
Discussion about this post