Çështja e Dritan Dajtit vazhdon të mos zgjidhet nga organet kopetente, pasi që prej vitit 2009 akoma nuk është dhënë një vendim i formës së prerë për të.
“Dritan Dajti kap mat drejtësinë”, raporton televizioni Top Channel i cili risjell edhe njëherë tjetër në vëmendje çështjen e Dajtit dhe paaftësinë e gjykatave.
Mësohet se Gjykata e Lartë ka kthyer dosjen e të pandehurit për rigjykim në Apelin e Krimeve të Rënda.
Por prej muajsh shkalla e dytë nuk po formon dot trupën gjyqësore që do të gjykojë këtë dosje, që shënoi rekord me 300 seanca të shtyra për shkak të mungesës së avokatëve.
Zëdhënësi i KLD-së, Elis Kuçi tha se Apeli i është drejtuar Këshillit të Lartë të Drejtësisë më datë 22 nëntor për të gjetur gjyqtarë që do ta gjykojnë Dajtin në shkallën e dytë.
“Lidhur me këtë gjykim, kjo do të jetë tek delegimi që do miratohet nga KLD në mbledhjen e radhës. Asnjëherë kërkesat për delegim gjyqtarësh nuk janë vonuar nga KLD dhe kurdoherë janë miratuar në mbledhjen më të afërt. Në rastin konkret kërkesa ka ardhur më 22 nëntor, ndërsa mbledhja e fundit është bërë më 18 nëntor. Mbledhja e radhës nuk është përcaktuar ende dhe nuk ka një datë në këtë moment që flasim”, tha Kuçi.
Por sipas burimeve të televizionit, edhe KLD ndodhet në ngërç, kjo sepse Unioni i Gjyqtarëve në Gjykatën Kushtetuese, ka bërë një padi ku kërkohen pezullimin e ligjit “për statusin e gjyqtarëve dhe prokurorëve”.
Kushtetuta thotë se kompetencat për emërimin dhe transferimin e gjyqtarëve I ka KLD, porn ë një nga pikat e këtij ligji kërkohet heqja e këtyre kopetencave nga ky organ.
Mesa duket, çështja e delegimit të gjyqtarëve për dosjen “Dajti” dhe emërimi i 10 magjistratëve varet nga Dhoma e Këshillimit të Gjykatës Kushtetuese. Kështu kjo çështje rrezikon të zvarritet akoma më gjatë. (D.D/Shuplaka)
