Në një reagim në rrjetet sociale, një prej anëtarëve themelues të PD-së e njëherazi student aktiv në protestat e Dhjetorit ’90, Dritan Shano, shkruan mbi situatën aktuale politike në të cilën është përfshirë Partia Demokratike.
Ai e nis shkrimin e tij me një fjalën e dishepullit Gjoni, ku shkrehet se ai që është pa mëkate, pra nëse ka të tillë, të hedhë gurin e parë mbi të, duke iu referuar Lulzim Bashës.
Shano ndalet tek fitorja e PS-së, duke analizuar shkurtimisht arsyet pse Partia Socialiste fitoi, ndërsa për hapjen e garës brenda PD-së, ai shprehet se PD e ka sot të nevojshëm një proces gare reflektues, por që duhet të jetë për të mirën e PD-së, jo të shndërrohet në strehë mllefi.
Sipas Dritan Shanos, zgjidhjet për të ardhmen e Partisë Demokratike duhet të gjenden në të tashmen dhe jo në të shkuarën.
Reagimi i Dritan Shanos:
Kush prej jush ështe pa mëkate, le të gjuajë gurin e parë mbi të! Gjoni 8:7 Është e qartë se ne si PD kemi humbur rëndshëm kësaj rradhe. PS ka 70% më shumë deputetë në Kuvendin e Shqipërisë sesa ne. Është e qartë po ashtu se kanabis, frika e njerëzve, bandat e pushtetit, oligarkët kanë ndikuar fort në këtë rezultat duke alteruar votën.
Është gjithashtu e qartë se shumë nga votat tona për shkak të hezitimit dhe pakënaqësive nuk ishin në kuti, i qëndruan larg asaj. Si kurrë ndonjëherë pati njerëz që kërkuan largimin e Kryetarit në mes të fushatës, por si gjithmonë pati demokratë të cilët shërbyen konkurrimit politik të papërkulur, pa i shkuar ndërmend të flirtojnë me kundërshtarin politik dhe as të shesin mend mbas ndonjë komforti përfitimesh nga PD-ja. Grupime brenda PD-se kanë kërkuar dorëheqjen e Bashës dhe fillimin e një proçesi gare për lidershipin e partisë.
Unë mendoj se PD e ka sot të nevojshme një proçes gare reflektuese, një garë e cila shpresoj si çdo demokrat, që të jetë e vërtetë dhe e sinqertë, për të ringritur besimin dhe besueshmërinë e shqiptarëve tek përfaqësimi i saj, si në nivel individual ashtu dhe si forcë politike. Gara për lidershipin e PD do të kryhet; ajo duhet të jetë për të mirën e PD-së; ajo nuk mund të shndërrohet në strehën e mllefit dhe thirrjeve për linçim të atyre që asnjë demokrat nuk i linçoi kur patën rradhën, në strehën e kujtdo që nuk arrin as ta fshehë dëshirën se mezi po pret që të fitojë nga humbja.
Shpresoj që ajo të jetë e qetë dhe dinjitoze, siç garuesit i detyrohen çdo demokrati të thjeshtë. Në çdo rast, zgjidhjet për të ardhmen e PD do gjenden në të tashmen dhe jo në të shkuarën. Të gjithë ata që marrin përsipër të udhëheqin njerëz bashkë me incentivat e secilit prej këtyre njerëzve duhet të mbajnë parasysh ç’thotë Talleyrand: Arti i vendosjes së njerëzve të duhur në vendet e duhura është më i pari në shkencën e qeverisjes; por arti i gjetjes së vendeve për të pakënaqurit është ai më i vështiri.
Secili që mendon të garojë apo të mbështesë kandidatë për të udhëhequr njerëz në krye të Partisë Demokratike duhet ta pyesë veten si i ka ekzekutuar këto arte, si të parin ashtu dhe të dytin. Merrni njëherë frymë thellë. Gara fillon së shpejti. Të dëgjojmë dhe të votojmë.
(XH.A/SHUPLAKA)
