Pasditja e së dielës, ishte shumë e vrullshme në portin e Durrësit, teksa u sinjalizuar për një ‘’Toyota Yaris’’ të mbushur me miliona euro.
Gjithçka do të ishte një surprizë nëse një fakt të tillë nuk do ta kishte përmendur të enjten e shkuar në Kuvend kreu i PD-së Lulzim Basha, teksa replikonte me Ballën që shkrihej gazit.
Deri më tani nuk ka pasur asnjë reagim zyrtar nga ana e PD-së, përveç një postimi në Facebook të deputetit Ervin Salianji, që më shumë sesa me orgjinën, po merrej me procedurën e numërimit të eurove.
Po ashtu heshtje totale është dhe në anën tjetër, të qeverisë, e cila duket se e ka lënë gjithçka për tu zbardhur nga ana e organeve të hetimit. E megjithatë, fakti që Lulzim Basha e kishte informacionin përpara se makina të vinte në port, shton edhe më shumë dyshimet rreth kësaj ngjarjeje.
Është vërtet e çuditshme, duke ditur lehtësinë me të cilën shprehen politikanët tanë, që në këtë rast kanë zgjedhur të gjithë njëzëri që të heshtin.
Po ashtu mbetet mister nëse ky operacion i finalizuar në Durrës ka qenë një aksion vetëm i policisë shqiptare, apo indicia është dhënë nga agjensitë e huaja.
Mësohet se personi që ka porositur makinat nga jashtë ende nuk është identifikuar, ndërsa në rrugë jozyrtare mësohet se janë arrestuar 3 persona, dy shoferët dhe administratori i kompanisë që transportoi makinat. Shoferët janë Klevi Cani 21 –vjeç dhe Agim Ceka 61-vjeç, ndërsa administratori është Edi Lika.
Dje pak para mesnate burime për ‘’Fax NeWs” nga grupi hetimor bënë me dije se ishte prishur dhe paisja e numërimit të eurove, dhe ende nuk ka një të dhënë zyrtare lidhur me shifrën që është kapur.
Gjatë ditës së sotme pritet që të ketë detaje nga ana e Policisë lidhur me këtë ngjarje që shtron shumë dritëhije.
(E.K/FAXWEB.AL)
Discussion about this post