Vajza e shkrimtarit të ndjerë Dritëro Agolli ka ndarë momentet e fundit të tij.
Elona Agolli ka përshkruar veprimet e fundit të shkrimtarit teksa i dorëzohej vdekjes.
Ajo thotë se kur Dritëroi u përmend, për herë të fundit kërkoi një letër dhe stilolaps për të shkruar diçka.
“I sollën një fletë letre e një dosje të kuqe ku të mbështeste letrën. Me dorën që i dridhej nisi të shkruante,por ah sa dhimbje: Koka e mbështetur në atë krevat reanimacioni, dhimbjet e trupit dhe te shpirtit, tërë ato tubacione të formave e dimensioneve të ndryshme, gypa në fyt, anash qafës disa si fije të holla që nuk kuptoheshin çfarë funksioni kishin , një mishmash pajisjesh . Në atë sallë ishte e pamundur që dora të shkiste e të formonte shkronja, fjalë, fraza”, kujton Elona.
Ajo thotë po ashtu se nuk ka arritur që nga ajo ditë të deshifrojë se cfarë ka dashur të thojë i ndjeri Dritëro me shenjat që ka shkruar në letër.
“E megjithatë disa iniciale , E, A, një grupim inicialesh , vështirë të kuptueshme, babushi im arriti t’i bënte.Gjithsecili nga ne ëndërronte që ato të ishin shkruar për çdonjërin: Mami thoshte që ja , Dritëroi nuk më pa që isha aty e donte të shkruante: Ku është Sadija ?
E ndoshta kishte të drejtë . Edhe infermieret shpreheshin që Dritëroi thërret veçse Sadijen kur zgjohet .
Tani ,sigurisht mendonte që Dritëroi donte të shkruante për Tanin , amanetet e tij .
Dhe unë po ashtu mendoja vetmevete: Ja , babushin e ka marrë malli për mua, donte të shkruante diçka për vajzën e tij dhe bijën e çmuar të tij .
Ende dhe sot ditën që shkruaj nuk e kam zbërthyer dot atë tog hieroglifesh , të fundmet kompozime gërmash të shkruara nga dora e bukur e atit tim” shkruan ajo. (M.D/ Shuplaka)
