Gazetari i News 24, Artan Hoxha vijon të jetë në Rrëshen, aty ku policia e Lezhës, Mirditës dhe FNSH-të ndërhynë për të bllokuar një magazinë ku përpunohej kanabisi, brenda së cilës ndaluan edhe 15 persona.
Në një komunikim pak momente më parë, Hoxha deklaroi sërish se sasia e kapur e drogës ishte e madhe, mbi një ton, ndërsa magazina ku u gjet droga ishte një depo e kohës së komunizmit. Ai është i mendimit që bëhet fjalë për një grup të organizuar mirë dhe me lidhjet e duhura.
“Po të shihni fotot aty ka disa rafte, shumë afër njëri-tjetrit. Personat që e kanë administruar kanë krijuar vende shumë të ngushta për ta tharë. Objekti ishte shumë afër rrugës nacionale. Bëhet fjalë për një grup të organizuar mirë që ka pasur lidhjet e duhura dhe garancitë e duhura për ta bërë këtë gjë”.
Hoxha thotë se operacioni nuk ka përfunduar ende, por se policia e ka kapur objektivin.
“Po kontrollohen banesat e gjithë personave të ndaluar sot, po merren në pyetje intensive për të gjetur të gjithë rrjetin, financuesit, organizatorët, nëse ka pasur ndonjë garantues pjesëtar i strukturave shtetërore”. /bw/