Kreu i Partisë Demokratike Lulzim Basha, ka reaguar lidhur me drogën e kapur sot në Itali. Basha sulmon kryeministrin Edi Rama duke thënë që premtimet e tij për luftë kundër drogës janë vetëm mashtrime.
Sipas kreut të opozitës, është pikërisht kryeministri Rama ai që i mbron dhe i promovon bosat e krimit të organizuar.
“Ngarkesa prej 2,3 tonë drogë e kapur sot në Itali dëshmon një të vërtetë të hidhur: trumpetat e Edi Ramës për luftë kundër drogës janë vetëm mashtrime me qëllim tulatjen e qytetarëve dhe të komunitetit ndërkombëtar. Ndërkohë ai mbron dhe promovon kokat e krimit të organizuar dhe bashkëpunëtorët e tyre politikë. Ky në fakt është projekti PS+ i shpallur prej tij: PS+drogë+kriminelë+korrupsion.”, reagon Basha.
Sipas kreut të PD-së, një gjë e tillë vërtetohet edhe nga fakti se qeveria amerikane i ka refuzuar Gramoz Ruçit hyrjen në SHBA, por që Rama vetëm e promovon.
“Kjo faktohet edhe nga promovimi prej tij i Gramoz Ruçit të cilit që nga 2005 qeveria amerikane i ka refuzuar hyrjen në SHBA për shkak të përfshirjes në krimin e organizuar dhe trafikun e drogës, dhe Fatmir Xhafës të përfshirë në mbrojtjen e të vëllait të dënuar nga Italia për trafikun ndërkombëtar të kokainës.
Opozita do të bëjë çdo përpjekje për ta vënë atë para përgjegjësisë personale për drogën dhe krimin. Por kjo betejë kërkon edhe përpjekjet e medias, intelektualëve dhe të gjithë qytetarëve. Të gjithë duhet të ngremë zërin dhe të ngrihemi kundër rrezikut të drogës para se të jetë vonë.”, reagon Basha. (D.D/Shuplaka)
Discussion about this post