Trajneri i Vllaznisë, Ernest Gjoka, në televizionin Star Plus TV, ka dhënë sot detaje të reja mbi ngjarjen që tronditi dje Shkodrën ku ai u bë objektiv i një sulmi me thikë nga një person ende i paidentifikuar.
Personi tentoi të sulmonte Gjokën në fushën stërvitore “Asllan Rusi”, por falë ndërhyrjes së futbollistit Gilman Lika dhe disa personave të tjerë, Gjoka arriti të shpëtojë pa u lënduar.
“Kjo që ka ndodhur nuk ka lidhje me Shkodrën, me pjesën e shëndoshë të saj. Unë e di se Shkodra e Vllaznia janë tjetër gjë nga ajo që ndodhi. Autoritetet duhet të zbardhin ngjarjen dhe të gjejnë personin.
Zbardhja e ngjarjes do të shpëtonte moralisht ekipin e Vllaznisë.
Ekipi ka probleme sepse Bashkia është pronare dhe ka që mendojnë se mund të fusin fëmijët në ekip edhe pse nuk e meritojnë.
Ka që kanë mundur t’a bëjnë këtë, dhe kur ndryshohen trajnerët kërkojnë aktivizimin e tyre edhe pse ato nuk i nevojiten ekipit.
Kjo sjell pakënaqësi e presione ndaj trajnerit por në rast se dikush e meriton nuk ka trajner që nuk e përfshin. Unë jam i vendosur të shkojmë përpara, nuk do të largohem dhe ekipi do reagojë pozitivisht.”– u shpreh Ernest Gjoka.
Discussion about this post