Kryetari i Kuvendit të Shqipërisë, Ilir Meta, ka drekuar për rreth tre orë dje me kreun e Partisë Agrare Ambientaliste (PAA), Agron Duka.
Ky takim vjen pas letrës që Duka i dërgoi Metës ku e ftonte që të dilte nga qeveria dhe të bashkëpunonte për krijimin e një qeverie teknike.
”Unë e kisha parapërgatitur letrën për shkak të datës 20 dhe i kisha dhënë një sinjal Metës në një intervistë të mëparshme. Aty i bëja thirrje Metës pikërisht për shkak të kushteve po kalojmë, për hatër të stabilitetit dhe zgjedhjeve të ndershme, meqë ai dikur ka dhënë edhe një shenjë të tillë që mund të tërhiqej për një qeveri teknike për të shmangur kontestimet”, tha Duka në një intervistë për ”Shuplakën”.
Në letrën drejtuar kryeparlamentarit Meta, ai e cilëson qeverinë teknike si një garanci për zgjedhje të lira dhe të ndershme, si dhe një mundësi për t’i dhënë një tjetër hov procesit demokratik në Shqipëri.
“Qeveria teknike është një instrument politik që ju e keni artikuluar publikisht. Qeveria teknike është një garanci për zgjedhjet e lira dhe të ndershme. Qeveria teknike do të jepte një tjetër hov procesit demokratik në vendin tonë. Qindra mijëra qytetar kërkuan këtë në 18 shkurt. Le t’ju japim atyre këtë mundësi. Të shkojmë në zgjedhje me qeveri teknike, jo vetëm për të mbrojtur zgjedhësit dhe zgjedhjet, por për të hequr një herë e mirë nga ligjërata politike post zgjedhore foljen “vjedhje”. Nëse zgjedhjet do të organizohen me një qeveri sa më gjithëpërfshirëse, asnjë parti politike nuk do të ketë justifikime ose pretendime për rezultatin e 18 qershorit. Ky do të jetë edhe një rast i mirë për të dhënë një provë pjekurie politike të domosdoshme për procesin e integrimit evropian.”, shkruante Agron Duka në letër.(XH.A/SHUPLAKA)
Discussion about this post