“Durova 7 vite dhunë për hir të familjes”, gruaja nuk gjen drejtësi në gjykatën shqiptare

Dhuna në familje nuk po largohet nga kultura shqiptare, madje nëpër media raportohen raste nga më të ndryshmet.

Së fundmi, një grua e cila për 7 vite me radhë ka duruar fyerjet, dhunën fizike dhe psikologjike të bashkëshortit pijanec, nuk ka gjetur drejtësi as në institucionet që e kanë për detyrë të ia sigurojnë.

Gruaja e cila është edhe nënë ka treguar para trupit gjykues, se për të ruajtur familjen ka duruar për vite me radhë derisa bashkëshorti ka vënë seriozisht në rrezik jetën e saj.

“Ka që prej shtatë-tetë vjetësh që bashkëshorti im konsumon pije alkoolike, kalon në gjendje të dehur dhe ushtron dhunë fizike ndaj meje. Unë jam pajisur një herë me urdhër mbrojtje por me qëllim që të mos shkatërroja familjen duroja dhunën që ushtronte ndaj meje dhe nuk bëja kallzim. Vitin e fundit thuajse çdo ditë ushtron dhunë fizike dhe psikologjike ndaj meje”, ka rrëfyer gruaja.

Mirëpo, prokuroria dhe gjykata e kanë akuzuar bashkëshortin dhunues vetëm për episodin e fundit të dhunës. Episod kur është dashur ndërhyrja e policisë për ta shpëtuar gruan nga dhuna e të shoqit, i cili mund ta vriste nga casti në cast. Pavarësisht dëshmisë rrënqethëse, gjykata ka vendosur ta gjykojë bashkëshortin dhunues vetëm me një vit burgim. (D.D/Shuplaka)