Specialistët e Hetimit të Krimeve në Komisariatin e Policisë Durrës, në bashkëpunim me Seksionin e Hetimit të Krimeve ndaj Personit në Drejtorinë Vendore të Policisë Durrës, arrestuan shtetasin Arben Limani dhe shpallën në kërkim tre të tjerë për grabitje me armë zjarri.
Sipas kallëzimit të një shtetasi, dje në lagjen nr.13, Durrës, katër persona i morën me dhunë dhe duke e kanosur me armë zjarri shumën prej 150,000 lekësh. Pas hetimeve të shpejta, në pranga u vu Arben Limani, ndërsa tre të tjerët, Ridjon Imeri, Luis Imeri dhe Edison Muhametaj, janë shpallur në kërkim.
Policia vijon punën për kapjen e tre personave të mbetur dhe për dokumentimin e plotë të ngjarjes. Materialet i janë kaluar Prokurorisë pranë Gjykatës së Shkallës së Parë Durrës për veprime të mëtejshme.
