Policia e Durrësit ka proceduar penalisht 4 shtetas, të cilët akuzohen për ndotje të mjedisit, pas konstatimit të hedhjes së mbeturinave në trotuare dhe hapësira publike.
Gjatë kontrolleve të vazhdueshme në terren dhe në vijim të ankesave të qytetarëve, shërbimet e Komisariatit të Policisë Durrës konstatuan në lagjen nr. 1, grumbullime mbeturinash të hedhura në mënyrë të përsëritur jashtë koshave, përpara disa bizneseve.
Pas veprimeve hetimore, u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Durrës, ku ka nisur procedimi penal për shtetasit:
-
K. K., 42 vjeç
-
M. Ç., 50 vjeç
-
P. M., 45 vjeç
-
R. U., 35 vjeç
Këta shtetas, banues në Durrës dhe Tiranë, dyshohet se kanë ndotur mjedisin në mënyrë të përsëritur, duke hedhur mbeturina të lokaleve të tyre në rrugë, jashtë zonave të dedikuara për grumbullimin e mbetjeve.
Policia apelon për respektimin e ligjit dhe ruajtjen e pastërtisë së mjedisit, si dhe fton qytetarët të denoncojnë çdo rast të ndotjes apo shkeljeje që cenon jetën komunitare.
