Drejtoria Vendore e Policisë Durrës ka intensifikuar masat për garantimin e rendit dhe qetësisë publike gjatë sezonit turistik veror, me fokus të veçantë kontrollin e ndotjes akustike në zonat turistike.
Në zbatim të Planit të Masave për sezonin veror dhe ligjit nr. 9774, datë 12.07.2007, “Për administrimin e zhurmës në mjedis”, i ndryshuar, janë organizuar grupe të posaçme kontrolli në terren. Këto grupe kanë kryer matje të nivelit të zhurmës në ambiente të hapura dhe të mbyllura, për të verifikuar respektimin e kufijve të lejuar.
Rezultatet e matjeve, të kryera sipas procedurës standarde, kanë treguar se niveli i zhurmës ka qenë brenda kufijve të lejuar ligjorë.
Krahas matjeve të zhurmës, Policia ka ushtruar kontrolle edhe për respektimin e orarit të lejueshëm të muzikës në ambiente të hapura në zona të banuara. Sipas rregullave në fuqi, muzika në këto ambiente lejohet vetëm nga ora 11:00 deri në orën 24:00.
Paralelisht me kontrollet, janë zhvilluar takime sensibilizuese me persona fizikë dhe juridikë, të cilët në veprimtarinë e tyre gjenerojnë zhurma, për t’i informuar mbi detyrimet ligjore dhe pasojat e shkeljeve të mundshme.
Policia e Durrësit mbetet e përkushtuar për të garantuar një ambient të qetë dhe të sigurt për të gjithë banorët dhe turistët, duke ndërhyrë menjëherë ndaj çdo rasti të shkeljes së ligjit dhe ndotjes akustike.
