Dy ditë pas vdekjes së gazetarit Andrea Stefani, një tjetër gazetar shqiptar ka humbur jetën.
Bëhet fjalë për gazetarin kosovar nga krahina e Deçanit, Shpend Lokaj.
Ky lajmi është bërë publik nga Asociacioni i Gazetarëve të Kosovës përmes një njoftimi për median.
Sipas AGK lajmi për vdekjen e Lokajt ka prekur të gjithë komunitetin e gazetarëve.
“Asociacioni i Gazetarëve të Kosovës shpreh ngushëllime për vdekjen e kolegut Shpend Lokaj. Lajmi për vdekjen e Shpendit e ka prekur të gjithë komunitetin e gazetarëve. Në këto momente të rënda bashkëndjejmë me familjen dhe miqtë e tij. Shpendi ishte i përkushtuar në punën e tij si gazetarë në funksion të informimit të drejtë të qytetarëve.”, shkruan AGK.
Për vdekjen e gazetarit ka reaguar edhe kryetari i Deçanit, Rasim Selmanaj, i cili shpreh ngushëllimet e tij për familjen.
“Shkuarja në amshim e gazetarit shumëvjeçar, Shpend ( Ahmet ) Lokaj, nga Lumëbardhi i Deçanit, është humbje jo veç për familjen, por edhe për gazetarinë dhe shoqërinë mbarë.”, shprehet kryetari.
Ndër të tjera Selmanaj njofton se do organizohet një Mbledhje Komemorative e cila do të mbahet me ditën e martë në Sallën e Kuvendit Komunal, duke filluar nga ora 11.00.
