Vllaznia është e përfshirë nga e njëjta situatë e vështirë po ashtu si sezonin e kaluar kur siguroi qëndrimin vetëm në javën e fundit.
Kuqeblutë kanë pësuar dy disfata radhazi që e kanë ndërlikuar së tepërmi objektivin mbijetesë.
I gjithë ambjenti shkodran dhe drejtuesit e klubit kërkojnë një reagim të fortë nga skuadra dhe për këtë arsye u zhvillua një mbeldhje me dyer të mbyllura në ambjentet e stadiumit “Loro Borici”.
Kryetarja e bashkisë që është njëkohësisht edhe presidente e klubit, Voltana Ademi, anëtarë të këshillit bashkiak, figura të njohura të futbollit shkodran diskutuan për 2 orë me skuadrën dhe stafin teknik për të kuptuar se çfarë nuk po funksionon dhe si mund të dilet nga kjo gjendje jo e mirë.
Në përfundim të mbledhjes administratori Astrit Gjyrezi u shpreh për mediat se qëllimi kryesor i takimit ishte mbështetja për skuadrën dhe marrja e përgjegjësive.
Pas sfidës ndaj Luftëtarit u ngritën edhe dyshime për të ardhmen e trajnerit Gjoka.
Në lidhje me këtë pikëpyetje Gjyrezi ishte i qartë duke konfirmuar teknikun aktual, teksa theksoi se nuk ka asnjë penalizimim për ekipin.
Vllaznia aktualisht ndodhet në vendin e parafundit me të njëjtën kuotë pikësh me Teutën, por ndeshjet direkte favorizojnë durrsakët.
Të shtunën kuqeblutë do të përballen me Lacin në Shkodër.
(F.G/Faxweb.al)
Discussion about this post