Plot dy milionë euro të ardhura nga shitja e katër lojtarëve në një hark kohor prej më pak se dy vitesh. Skënderbeu është tashmë shembulli për t’u ndjekur nga të gjitha klubet shqiptare, teksa ka vendosur një standard të ri me transferimet që ka bërë.
Deri para shtatë vitesh cilësohej si një arritje e madhe përfitimi i Vllaznisë nga shitja e Xhevahir Sukajt, Gilman Likës dhe Admir Telit në Turqi (250 mijë euro), por në Korçë tashmë ka një tjetër realitet.
Transferimet nisën në dhjetor të vitit 2015 me sulmuesin Peter Olainka dhe po vazhdojnë me talentin kosovar, Agim Zeka.
Olayinka
U afirmua te Bylisi në kampionatin shqiptar, por më pas u ble nga Skënderbeu për 30 mijë euro. Klubi korçar i kishte idetë e qarta me sulmuesin. Presidenti Takaj, duke parë talentin e nigerianit, mendonte se me shpërthimin e tij, në pak kohë do ta shiste në një klub të njohur europian. Mes disa ofertave, më bindësja ishte ajo e Gent, klubi kampion i Belgjikës në sezonin 2014-2015. Belgët vendosën në dispozicion 1.1 milionë euro, në një kohë që gazeta mëson se nga këto parà, korçarët kanë arkëtuar në total 850 mijë euro. Pjesa tjetër ka shkuar si bonus për ata që bën të mundur këtë transferim të bujshëm.
Nga Besa e Pejës te Besa e Kavajës. Mjaftoi një sezon për të shkëlqyer në kampionatin shqiptar dhe për t’u “peshkuar” më pas nga Skënderbeu. Takaj arriti marrëveshje me presidentin e Besës, Nexhat Bizhdili, për një shumë modeste, por në janar të vitit 2016 përfitoi 350 mijë euro pas kalimit të kosovarit tek Anzhi në Rusi.
Në fakt, është përfolur se transferimi ka shkuar 600 mijë euro, por e vërteta qëndron ndryshe. Gjithsesi, nga Berisha klubi korçar ka përfituar në total 550 mijë euro, sepse këtu futen edhe 200 mijë euro që Skënderbeu pritet të arkëtojë pas shitjes së dytë të mesfushorit te Terek Grozni. Korçarët zotërojnë 10% të kartonit të lojtarit dhe kësisoj dalin sërish të fituar pas marrëveshjes që dy klubet ruse bënë pak ditë më parë.
Xhejms
Shpenzuan 150 mijë euro për ta blerë nga Laçi dhe tashmë jo vetëm do të rimarrin këtë shumë, por do të fitojnë ekstra 150 mijë euro të tjera. Klubi koreanojugor, Guangju, do të japë për kartonin 360 mijë euro. Nga kjo shumë, korçarët arkëtojnë 300 mijë euro, pasi kartonin e kanë në bashkëpronësi me Laçin. Nga ana tjetër, kurbinasit përfitojnë 60 mijë euro nga shitja e sulmuesit. Zyrtarizimi i transferimit do të bëhet pas pak ditësh, kur Xhejmsi t’i bashkohet ekipit koreanojugor në fazën përgatitore në Portugali. Klubi korçar ka aplikuar për vizë dhe nigeriani pret të bashkohet me ekipin e ri.
Zeka
Nuk konsumoi as 90 minuta në kampionat me fanellën e Skënderbeut, por befas e sheh veten pjesë e francezëve të Lilles, me klubin korçar që do të arkëtojë jo pak, por 300 mijë euro. Bëhet fjalë për një 18-vjeçar kosovar shumë të talentuar, që arriti të tërhiqte vëmendjen e klubeve europiane gjatë eliminatoreve të kampionatit Europian U-19. I shënoi dy gola Gjermanisë në humbjen 3-2 të Shqipërisë. Tashmë do të bëhet pjesë e Lilles, ku firmosi për 4 vite. (A.R/SHUPLAKA)
Discussion about this post