Ka pasur dy raste në këto ditët e fundit ku qeveria ka tentuar të na hedh hi syve, të bëjë sikur na ka kuptuar, sikur ka reflektuar për të na vënë në gjumë pas kësaj. Shkoza dhe ligji për mbetjet, këto kanë qenë dy nga çështjet më të debatuara së fundi në opinionin publik.
Po për të dyja dje nga SHBA, kryeministri Rama na ka bërë të kuptojmë fare mirë që jo vetëm kthim pas nuk ka po realizimi do të nis me hapa të shpejta.
Ndërsa fillimisht në Shkozë përdori deputen e zonës, Elena Gjebrenë për të neutralizuar banorët, për mbetjet vuri në punë Eduard Shalsin dhe Taulant Ballën, edhe pse në mendjen e tij e dinte fare mirë se çfarë do të bënte.
Kështu dje Rama u shpreh për Shkozën se pyetja për ata banorë nuk duhet t’i bëhej fare në “New York”. Sigurisht nuk është detyrë e kryeministrit që të shqetësohet për rreth 700 banorë që do të mbeten rrugëve!
“Shkoza nuk përfaqëson asgjë dhe nuk meriton koment deri në New Jork apo Washington. Është një proces si shumë të tjera, ku fshihen ndërtimet pa leje për të mirën e përbashkët.
Patjetër që nuk mund të pretendohet as të shpërblehet, as të dëmshpërblehet, as të shpronësohet por meriton të drejtohet me kujdes, duke i dhënë mundësinë qytetarëve të një qeraje për pak kohë, derisa familjet të gjejnë një vend ku të mund të strehohen me forcat e tyre.
Shteti ka për detyrë t’u shërbejë qytetarëve. Të bësh shtet, punën dhe mirëqenien nuk ka shumë rrugë. Rruga është e qartë dhe ska nevojë për shqetësime të kësaj natyre.”, tha Rama.
Ndërsa sa i përket ligjit për mbetjet Rama tha se qentë le të lehin karvani shkon përpara. Pra kryeministri quan qen këdo nga mijëra njerëzit që prej ditësh shprehen kundra këtij ligji.
“Kryetari i grupit ka qenë shumë i qartë. Ne do të rikthejmë në një diskutim të gjerë dhe shterues me publikun këtë temë me të cilën lloj-lloj sharlatanësh, lloj-lloj karagjozësh, lloj-lloj politiko-çakejsh në kazanin politik dhe mediatik kërkojnë të fitojnë pikët e tyre duke mashtruar publikun dhe patjetër në respekt të ndjeshmërisë së lartë dhe të drejtë të publikut.
Ne do të marrim gjithë kohën e nevojshme që njerëzit të kuptojnë se këtu nuk bëhet fjalë fare për gjithçka kazani mediatik dhe kazani politik vorbullën në funksion të axhendave tërësisht politike apo vetjake, por bëhet fjalë thjesht dhe vetëm për një proces modernizues, europianizues të Shqipërisë dhe për mundësinë që Shqipëria të ketë një kapacitet riciklues të mbetjeve të gjelbra siç e kanë të gjitha vendet e tjera. Jemi i vetmi vend që nuk e kemi. Megjithatë nuk ka urgjencë qentë le të lehin, karvani do eci përpara.”,-tha Rama për mbetjet.
Pra të gjithë ata që menduan se kryeministri dhe qeveria do të tërhiqeshin pas reagimit qytetar, kanë gabuar rëndë. Jo vetëm tërheqje nuk ka po dozat e arrogancës sa vijnë edhe shtohen!
(E.K/SHUPLAKA)
Discussion about this post