Muzeu Marubi, do të vendosë përballë një serie fotografike, pikturën e njohur të Idromenos “Dy rrugët”.
Adrian Paci është kuratori që ka bërë të mundur çeljen e kësaj ekspozite e cila do të jetë e hapur për publikun, nga data 26 janar deri më 30 mars të vitit të ardhshëm.
“Personazh i çuditshëm, poliedrik dhe njëkohësisht i pashkollë, amator e mjeshtër i shumë fushave, përçues i kodeve të stabilizueme e novator, Kolë Idromeno do të imponohet si figura ma përfaqësuese e artit shqiptar të fundit të shekullit XIX dhe e fillimit të shekullit XX.
Kjo ekspozitë nuk merr përsipër të analizojë të gjithë spektrin e aktivitetit të Idromenos por, duke u nisë nga një zbulim i fundit në arkivën e Muzeut Marubi, vendos përballë një seri fotografike me pikturën e tij të mirënjohun “Dy rrugët”. Së shpejti ekspozita më e re në Muzeun Marubi…”
Në këtë vepër, piktori ka trajtuar dy rrugët, drejt ferrit a parajsës, në një tablo që merr shkas nga Bibla. Mendohet se ka po ashtu edhe një farë ndikimi nga “Komedia Hyjnore” e Dantes.
Në këtë pikturë paraqiten figura e simbolika të ndryshme biblike, për këtë arsye, “Dy rrugët” e Idromenos janë lënë në hije nga komunizmi.
Megjithatë të gjithë artdashësit do të kenë mundësi ta shohin nga afër, gjatë tre muajve në vazhdim. (D.D/Shuplaka)
Discussion about this post