Shërbimet partnere kanë ngritur shqetësimin pas disa të dhënave të besueshme për dy shtete që po tentojnë të nxisin destabilitetin në vendin tonë. Kështu shprehet “Top Channel” duke iu referuar burimeve konfidenciale.
Nuk bëhet e ditur se cilat janë këto dy shtete, por të dhënat që po qarkullojnë përforcojnë deklaratat e kryeministrit Edi Rama për disa të forca të huaja që nuk ia duan të mirën Shqipërisë.
“Pak ditë më parë, portali i njohur LajmPress në Maqedoni njoftoi për nje takim mes Damir Fazlliç, ish-shefit famëkeq të shërbimit sekret maqedonas Sasha Mihajllov, njëkohësisht kushëri i Nikolla Gruevskit, si edhe një personi nga Shqiperia.”, shkruan “TCH” duke vijuar se ky lajm përbën rëndësi pasi është konfirmuar edhe nga shërbimet inteligjente.
Lidhur me këtë takim nuk ka të dhëna, por Shkupi zyrtar është acaruar jo pak nga qëndrimet e forta të qeverisë shqiptare.
Qarku nacionalist grek që mbron platformën e aneksimit të “Vorio-Epirit” është një tjetër faktor që po angazhohet intensivisht kundër Tiranës. Kjo për shkak të “karshillëkut që shefi i qeverisë së Tiranës u ka bërë tezave të ultranacionalistëve grekë, të mësuar prej shumë vitesh me heshtjen e Tiranës zyrtare”.
“Situata duket kritike”, shkruan “TCH”, “Berlini zyrtar është tejet i shqetësuar dhe i angazhuar lidhur me krizat me natyrë etnike apo me sfond përplasjesh gjeopolitike në Maqedoni, Mal të Zi, Bosnje-Hercegovinë apo Kosovë dhe nuk mund të pranojë përshkallëzimin e një krize thjesht politike në Shqipëri, si një prej vendeve ku procesi i Berlinit është investuar aq shumë.”
(XH.A/SHUPLAKA)
