Strukturat e Mbrojtjes Civile (MC) dhe të Shërbimit të Zjarrfikëses (MZSH) janë angazhuar në dy ndërhyrje të ndara për shuarjen e vatrave të zjarrit në qarqet Lezhë dhe Kurbin.
Sipas njoftimit të autoriteteve lokale, një vatër zjarri është shfaqur sot në një sipërfaqe me ferra pranë një kanali, në fshatin Gjorm, njësia administrative Mamurras, bashkia Kurbin.
Zjarri është lokalizuar dhe fikur, falë ndërhyrjes së shpejtë të zjarrfikësve. Për momentin, nuk raportohet për dëme materiale apo rrezik për banesat përreth. Jemi në pritje të një raporti përmbledhës nga strukturat përgjegjëse.
Po sot, një tjetër vatër zjarri është regjistruar në një sipërfaqe me barishte dhe ferra në lagjen SMT, në qytetin e Lezhës. Në vendngjarje ndodhet një mjet zjarrfikës me personelin përkatës, të cilët janë angazhuar për neutralizimin e flakëve.
Strukturat e MZSH-së së Lezhës mbeten në terren për të monitoruar situatën dhe për të parandaluar përhapjen e mëtejshme të zjarrit.
Autoritetet u bëjnë thirrje qytetarëve që të tregojnë kujdes maksimal, sidomos në këto ditë me temperatura të larta, dhe të raportojnë menjëherë çdo zjarr apo tym të dyshimtë në hapësira publike ose pyjore.
📞 Numri emergjencës: 112
