Shumëkujt mund ti kujtohet momenti kur një i ri mori guximin t’i propozonte të dashurës së tij Live në ‘’Kënga Magjike” rreth dy vite më parë.
Lulzim Tota, dhe e dashura e tij Marsi më në fund kanë lidhur martesë. Mjaft simpatikë shihen në dy në ditën e veçantë të kurorëzimit të tyre.
Lulzimi është nga qyteti i Pukës, ndërsa partnerja e tij nga qyteti i Pogradecit dhe historia e tyre është vërtet për mos t’u humbur.
PO Ç’NDODHTE NË “KËNGA MAGJIKE” DY VITE MË PARË:
Një djalë i ka propozuar live në Kënga Magjike vajzës që ai dashuron. Luli është emri i djalit nga Puka, i cili i ka bërë të dashurës së tij, Marsit, nga Pogradeci, propozimin e martesës në skenën e Këngës Magjike. Ai i është ulur në gjunjë në sytë e të gjithë publikut dhe shikuesve, duke e bërë atë të mallëngjehet dhe të thotë pa asnjë dyshim ‘po’.
Ndërsa motra e djalit e kishte nxjerrë Marsidën në hollin e Pallatit të Kongreseve me pretekstin se ndihej keq, Ardit Gjebrea ka përfituar që të pyesë Lulin se si janë njohur. Luli ka rrëfyer se prindërit e vajzes nuk e kishin dashur pasi ai ishte ‘malok, katolik, pra pa asnjë pikë lidhjeje’.
Për një kohë të gjatë kishin bërë sakrifica, duke u dashur që vajza të shkonte çdo ditë deri në Lezhë, ku jetonte Luli, për të ndenjur me të. Ai tregoi se Marsida i kishte pëlqyer shumë që herën e parë që e kishte parë në lokalin ku ai ishte menaxher, dhe ishte përpjekur t’a gjente në çdo lloj mënyre, duke u shkruar të gjitha vajzave bjonde me emrin Marsida në Facebook.
Më pas, me ndihmën e motrës së Lulit, Marsida hyri brenda, dhe Arditi e thirri të ngjitej në skenë. Ndërsa vajza i drejtohej skenës, mbrapa saj qëndronte koreografja e Këngës Magjike. Për t’a bërë të dukej rastësore, Gjebrea i tha se e kishte pasur fjalën për Marsidën, koreografen e Këngës Magjike, e cila interpretoi një kërcim romantik së bashku me balerinin Endri.
Megjithatë Arditi i kërkoi Marsidës, të fejuarës së Lulit, të qëndronte ndërkohë me të, dhe ulur në kolltuk, i bëri disa pyetje mbi veten, përfshirë edhe lidhjen që kishte me të dashurin. Në atë moment Luli hyri nga shkallët duke i qëndruar mbrapa. ‘Si e ke imagjinuar ti propozimin?’, e pyeti Gjebrea Marsin, ndërsa Luli e thirri ‘zemër’, duke e lënë vajzën pa fjalë. ‘A do të martohesh me mua?’, i propozoi ai duke u ulur në gjunjë të dashurës së tij. ‘Nuk e kisha pritur kurrë se mund të ishe ti që të më bëje një surprizë të tillë. Jam shumë e lumtur. Po, pranoj!’, tha Marsida.
(E.K/SHUPLAKA)
