Numri i çifteve të cilët janë divorcuar gjatë vitit 2016 sa vjen dhe rritet.
Të dhënat e fundit nga Instituti i Statistikave flasin për dyfishim të numrit të divorceve. Nga 22 mijë martesa të kryera gjatë vitit 2016, 7 mijë prej tyre kanë përfunduar me ndarje.
Nga të dhënat e INSTAT, Blerina Subashi tregon për “Ora News” se në këto 10 vitet e fundit numri i martesave ka mbetur po në të njëjtin nivel rreth 22 mijë dhe se kemi një dyfishim të numrit të divorceve.. Para 10 vitesh numëroheshin diku te 3 mijë divorce, ndërkohë që sot kemi 7 mijë. Para 10 vitesh kishim 15 divorce në 100 martesa, aktualisht kemi 31 divorce në100 martesa.
Avokatia Vjollca Pustina e konsideron shqetësues dyfishimin e numrit të divorceve. Ajo thekson se ndryshe nga vite më parë, tashmë ka një shtim të kërkesave për divorc nga femrat.
“Shifrat janë alarmante. Janë shtuar shumë kërkesat për divorc në gjykatë dhe për urdhra mbrojtje. Ka qenë më i lartë numri i divorceve që kërkohej nga burrat, por sot ka ndryshuar ky raport janë gratë që marrin guximin dhe bëjnë kërkesë në gjykatë për t’u divorucar nga bashkëshortët”,shprehet ajo.
Pustina thekson se një nga faktorët kryesor është ai ekonomik, xhelozia në familje, por nga të parat është dhuna në familje si psikologjike ashtu dhe fizike.
Vitet e fundit në shoqërinë shqiptare, ndryshim ka pësuar edhe mosha mesatare e martesës, e cila është rritur me 3 vite për të dyja gjinitë, duke shkuar në 25 vjeç për femrat dhe 30 vjeç për meshkujt. (S.SH/Shuplaka)
