Mungesa e 500 tonëve kafe në bilancin e Doganave dhe dyshimet për kontrabandë kanë bërë që ministrja teknike e Financave, Helga Vukaj të urdhërojë një hetim dhe kontroll të imtësishëm të tregut.
Ministrja Vukaj ka urdhëruar hetimin, analizën dhe identifikimin e shkaqeve të rënies së importit të kafes gjatë 6-mujorit të parë të këtij viti, shkruan GSH.al.
Gjatë periudhës janar-qershor të vitit 2017 janë zhdoganuar 500 tonë kafe më pak se e njëjta periudhë e viteve të tjera. Kjo ka sjellë një “gropë” në buxhet dhe arsyet e kësaj grope synon të zbardhë ministria e Financave.
Dokumenti më poshtë është urdhri i plotë i ministres Vukaj i cili ka mbërritur në drejtorinë e Doganave.
Nga sa shkruhet në dokument, kërkohet që të ushtrohet kontroll në të gjithë importuesit e kafes në vend.
Po ashtu kërkohet që në bashkëpunim me hetimin Tatimor të identifikohet çdo sasi e importuar nga këto kompani dhe të kërkohet informacion edhe nga doganat e vendeve fqinje. (M.D/Shuplaka)
Discussion about this post