Elbasani ka qenë një prej qarqeve ku raportohet të jenë shënuar incidente lidhur me shitblerjen e votës. Pas dyshimeve se në disa qendra votimi të këtij qyteti shpërndaheshin para në këmbim të votës, ambasadorja e Bashkimit Europian në Shqipëri, Romana Vlahutin, u nis drejt vendngjarjes.
Menjëherë pas saj mësohet se është nisur edhe kryeprokurori Adriatik Llalla. Mësohet se Llalla do të takohet me prokurorë dhe drejtues të policisë për të diskutuar mbi procesin zgjedhor dhe incidentet e raportuara.
Gjatë paradites u raportua se Policia e Elbasanit ka nisur procedimin penal ndaj 3 personave që janë kapur duke shpërndarë para dhe ushqime në këmbim të votës.
“Specialistët e Sektorit për Krimin Ekonomik dhe Financiar, në Drejtorinë Vendore të Policisë Elbasan, referuan materialet në Prokurori për procedim në gjendje të lire në ngarkim të shtetasit F.GJ., 56 vjeç banues në Tiranë.
Ky shtetas, në fshatin Zdrajsh duke lëvizur me automjet dyshohej se do të shpërndante para për blerje votash, në favor të një subjekti politik.
Gjatë kontrollit fizik u gjetën dhe u sekuestruan në cilësinë e provës materiale një sasi lekësh.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Dhënia e shpërblimeve dhe e premtimeve”.
Po kështu specialistët për Krimet, në Komisariatin e Policisë Elbasan referuan materialet në Prokurori për procedim në gjendje të lire në ngarkim të shtetasit A.J., 66 vjeç banues në Elbasan.
Ky shtetas dyshohet se do të shpërndante para për blerje votash në favor të një subjekti politik.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Dhënia e shpërblimeve dhe e premtimeve”.
Specialistët për Krimet, në Komisariatin e Policisë Cërrik referuan materialet në Prokurori për procedim në gjendje të lire në ngarkim të shtetasit XH.H., 24 vjeç banues në Cërrik.
Ky shtetas në Lagjen “ Nr.3” Cërrik , me mjetin e tij tip “Benz” dyshohet se do të shpërndante ushqime në këmbim të votave në favor të një subjekti politik.”, citohet në njoftimin e policisë.
(XH.A/SHUPLAKA)
