Dyshohet për sulm terrorist, shpërthejnë tre autobusë në Izrael

Tre autobusë bosh kanë shpërthyer në skajin jugor të Tel Avivit në atë që policia izraelite thotë se është një “sulm i dyshuar terrorist”.

Ngjarja ka ndodhur në parkingje në qytetin Bat Yam mbrëmjen e së enjtes. Nuk ka pasur viktima.

Pajisjet në dy autobusë të tjerë nuk arritën të shpërthenin sipas deklaratës së policisë.

Kryeministri izraelit Benjamin Netanyahu ka urdhëruar ushtrinë izraelite të kryejë “një operacion intensiv kundër qendrave të terrorizmit” në Bregun Perëndimor të pushtuar si përgjigje. Pamjet në mediat sociale treguan të paktën një autobus në zjarr në një parking, e cila ishte e mbuluar nga tymi. Zëdhënësi i policisë Aryeh Doron tha se oficerët janë ende duke u përpjekur për të gjetur më shumë bomba në Tel Aviv.

“Forcat tona janë ende duke pastruar zonën,” theksoi Doron për mediat lokale menjëherë pas shpërthimeve, duke shtuar se publiku duhet të jetë në gatishmëri për “çdo çantë apo objekt të dyshuar”. “Ne mund të jemi me fat nëse vërtet terroristët i vendosin këto kohëmatës në orën e gabuar. Por është shumë herët për të përcaktuar,” përfundoi ai.

Sipas mediave lokale, një nga pajisjet e pashpërthyera, me peshë 5 kg, mbante një mesazh duke thënë “Hakmarrja nga Tulkarm”, duke iu referuar një operacioni të fundit ushtarak izraelit kundër terrorizmit në Bregun Perëndimor.

Forcat e Mbrojtjes së Izraelit kanë kryer operacione kundër grupeve militante palestineze në Bregun Perëndimor prej muajsh, veçanërisht duke u fokusuar rreth Tulkarm dhe Jenin në veri. Qindra palestinezë janë vrarë ndërsa forcat izraelite kanë intensifikuar bastisjet e tyre. Ministri i Transportit Miri Regev ndaloi të gjithë autobusët dhe trenat në të gjithë vendin në mënyrë që të mund të kryheshin kontrolle për mjete shpërthyese.