Prokuroria e Krimeve të Rënda ka kërkuar “arrest me burg” për Mikel Shallarin. Burime të Prokurorisë bëjnë me dije se kanë dorëzuar në gjykatë kërkesën. Referuar materialeve të dorëzuara në gjykatë, Mikel Shallari akuzohet për vrasje me motive gjakmarrje të kryer në bashkëpunim.
Akuza është ngritur në bazë të nenit 78/A, që parashikon vrasjen e kryer në bashkëpunim për interes hakmarrjeje apo gjakmarrjeje dhe që dënohet nga 25 vjet deri në burgim të përjetshëm. Ndërkaq, prokurorët janë të sigurtë se Mikel Shallari është personi që shkrepi armën në derën e shtëpisë së ish-kryekomisarit Artan Cukut.
Pas afro dy muajsh nga vrasja e Artan Cukut, policia vuri në pranga një të dyshuar si personi që e ekzekutoi atë në derën e shtëpisë.
Mikel Sh. 24 vjeç u kap në Tiranë në orët e para të mëngjesit. Ai u ndalua në makinën e tij ku gjendej nën shoqërinë e një vajze dhe një miku pranë “Pallatit me Shigjeta” në afërsi të rrugës së Kavajës. Ai banonte prej disa kohësh në Tiranë në një godinë pranë “Qytetit Studenti” ndërsa nga data 8 prill që kreu krimin rezulton se ka tentuar disa herë të largohet jashtë vendit.
(XH.A/SHUPLAKA)
Discussion about this post