49-vjeçari Fadi Alwan, i cili dyshohet se në muajin Shkurt vrau vajzën e tij Rayyan Alwan në Tiranë, është arrestuar në Liban. Policia e Shtetit, njoftoi se ai u vu në pranga në bashkëpunim me Interpol Bejrutin.
“Gjykata e Shkallës së Parë e Juridiksionit të Përgjithshëm Tiranë, i ka caktuar këtij shtetasi, masën e sigurisë “Arrest në burg”, për veprën penale “Vrasja për shkak të marrëdhënieve familjare””, njoftoi policia.
Arsyeja e vrasjes së 24-vjeçares palestineze në Tiranë mbetet ende e paqartë. Ajo kishte udhëtuar bashkë me të atin në muajin Shkurt drejt kryeqytetit shqiptar. Ata qëndruan në një shtëpi me qira, ku u gjet edhe trupi i pajetë i Rayyan.
Kanë qenë autoritetet gjermane që kanë hedhur pak dritë mbi këtë ngjarje, pasi familja e Rayyan jetonte në Berlin. E reja i kishte denoncuar familjarët në polici pasi donte të bënte një jetë të lirë dhe perëndimore, diçka që ata nuk e lejonin. Për më tepër, 24-vjeçarja kishte qenë e martuar dhe kishte dy fëmijë në Liban, aty ku jetonte ish-bashkëshorti i saj.
Ndërkohë nëna e Rayyan kishte bërë një tjetër denoncim në policinë e Berlinit, më saktësisht më 26 Shkurt, një ditë para se e bija të gjendej e vrarë në kryeqytet. Ajo pretendonte se i kishte dhënë vajzës para për t’ia dhënë dikujt që e shantazhonte me një video nudo. Arrestimi i babait të 24-vjeçares mund të zbulojë më saktë shkaqet pse së resë iu mor jeta.
