Një shtetas polak është shoqëruar në komisariat nga Policia e Kakavijës i cili po udhëtonte drejt Greqisë, pasi është konstatuar se kishte probleme me dokumentet e tij të identifikimit.
Sipas raportimeve paraprake mësohet se ky shtetas udhëtonte me një ID Card greke të falsifikuar me emrin Dimitris K nga Athina. Forcat policore kanë dyshuar për autenticitetin e ID Card greke dhe kanë hulumtuar më tepër nga ku dhe rezultoi se shtetasi ishte polak.
Shtetasi me inicialet D.R., dyshohet të ketë gisht në një vrasje të kryer në kryeqytetin e Greqisë, Athinë. Burime konfidenciale shprehen se polaku 38 vjecar ka vrarë një vit më parë në kryeqytetin grek Athinë, Mihal Kapuranin.
Bëhet fjalë për një ngjarje të ndodhur disa muaj më parë ku një 23-vjeçar shqiptar u ekzekutua në sheshin e lagjes “Exarchia” të kryeqytetit të Greqisë, Athinë (Lexo këtu).
Sipas policisë, viktima është Mihal Kapurani nga Korça. Burime policore thanë se viktima u sulmua nga agresorët në sheshin e lagjes, pas një konflikti që pati mes tij dhe 3 bashkëkombasve të tij për shkaqe ende të panjohura. Ndërkohë ende nuk dihet se cila mund të ketë qenë roli i shtetasit polak në këtë ngjarje të rëndë.
Dyshohet se polaku është vrasës me pagesë dhe në Shqipëri ka hyrë ilegalisht.
Deklarata e Policisë:
Në datë 05.03.2019 në dalje të Republikës së Shqipërisë, në Pikën e Kalimit të Kufirit Kakavije, është paraqitur shtetasi me inicialet D.K, me pasaportë greke.
Nga verifikimi paraprak i punonjesve të policisë së kufirit dhe migracionit në PKK Kakavije lindën dyshime se ky shtetas përdorte dokument të falsifikuar dhe shtetasi u shoqërua për verifikime në vijën e dytë ku gjatë shoqërimit kundërshtoi punonjësit e policisë.
Nga kontrolli dhe verifikimi i mëtejshëm rezultoi se ky shtetas posedonte pasaportën me të dhëna të ndryshuara si dhe pasaporta rezultonte e vjedhur në sistemin e Interpolit.
Gjithashtu këtij shtetasi i janë gjetur edhe një kartë identiteti greke dhe nje leje drejtimi që dyshohet se janë të falsifikuara.
Nga veprimet e para hetimore, në bashkëpunim edhe me Z.Q.K Interpol Tirana, u bë i mundur verifikimi i identitetit të këtij shtetasi, i cili ishte shtetasi me inicialet D.R, shtetas Polak, i dyshuar si autor i vrasjes së një shtetasi shqiptar në vitin 2018 në Athinë, Greqi.
Në cilësinë e provës materiale u sekuestruan 550 euro, pasaporta greke, leje drejtimi dhe leternjoftimi si dhe nje aparat celular.
Në përfundim të veprimeve hetimore, nga ana e Seksionit për Hetimin e Krimeve Ekonomike e Financiare në D.V.P Gjirokastër, u bë arrestimi në flagrancë i shtetasit të mësipërm, për veprat penale “Falsifikim i letërnjoftimeve, pasaportave de vizave” , “Kalim i paligjshëm i kufirit” dhe “Mosbindje ndaj urdhërit të punonjësit policisë së rendit publik”, parashikuar nga nenet 189, 297 dhe 242 i K. Penal.
(F.GJ/FAXWEB.AL)
