Sulejman Starova ka dhënë sot dorëheqjen nga posti i teknikut të skuadrës së Partizanit, duke e lënë kështu skuadrën pa trajner.
Trajneri e ka konfirmuar largimin e tij në një prononcim për “Panorama Sport”, ku tregon se ka zgjedhur të mbajë vetëm rolin e këshilltarit të presidentit Gazment Demi.
“Në respekt te kërkesës se tifozëve i kam paraqitur presidenti Demi dorëheqjen time me qëllim që të mos cenohet harmonia në familjen e Partizanit”, është shprehur Starova.
Kujtojmë se vetëm një ditë më parë, grupimi “Ultras Guerrils” kërkoi nga klubi i Partizanit largimin e Starovës nga drejtimi i skuadrës.
Kjo kërkesë vjen pas dështimit në Ligën e Europës, gjë për të cilën “Ultras Guerrils” fajësonin Starovën.
Kështu gjatë këtyre ditëve, klubi pritet të nisë diskutimin për zgjedhjen e trajnerit të ri. Deri më tani, më favorit duket të jetë Mlladen Milinkoviç. (D.D/Shuplaka)
Discussion about this post