E fundit/ Harroi të deklaronte një pjesë të pasurisë, konfirmohet në detyrë gjyqtarja Kadi

Komisioni i Pavarur i Kualifikimit ka vendosur konfirmimin në detyrë të gjyqtares Brunilda Kadi.

Kadi është gjyqtare  në Gjykatën e Tiranës ndërsa ka punuar më herët në Gjykatën e Fierit dhe atë të Elbasanit, ajo është edhe kandidate për Këshillin e Lartë Gjyqësor.

KPK ka vendosur edhe për një çështje civile, një ankimim të një shtetasi spanjoll për gjyqtaren Kadi, të cilën e transferoi si shkelje pranë organit kompetent.

Gjyqtarja Brunilda Kadi doli e befasuar para medias, për vendimin disiplinor, ku u shpreh se shtetasi spanjoll nuk është bazuar në ligj.

“Është shumë teknike, është një ankimim  i një shtetasi të huaj i pabazuar në ligj. Faleminderit për vlerësimin!”, u shpreh ajo.

Kujtojmë që gjatë seancës dëgjimore Kadi  nuk kishte deklaruar shitjen e një apartamenti, duke  u shprehur se kishte harruar.  Ndërkaq kjo nuk ishte e vetmja gjë e padeklaruar nga ajo. Gjyqtarja nuk kishte deklaruar se bashkëshorti është aksioner në një shoqëri, ku sipas gjyqtares edhe këtë e kishte harruar. Totali i  pasurisë që ajo deklaroi kapte vlerën e 14.2 milionë lekë.

(J.D/Faxweb.al)