Më herët gjatë paradites, Prokurorja i Përgjithshme e Përkohëshme Arta Marku priti në takim në zyrën e saj, Prokurorin Kombëtar të Antimafias në Itali, z.Federico Cafiero De Raho.
Burime të Fax News bëjnë me dije se kryeprokurorja Marku theksoi gatishmërinë dhe angazhimin e prokurorisë për të bashkëpunuar plotësisht me palën italiane veçanërisht në hetimet e çështjeve me ndjeshmëri të lartë në Shqipëri. Ajo garantoi prokurorin Italian se do të ofrojë prokurorët më të mirë për të punuar në kuadër të opercauionit ‘Forca e Ligjit’.
Kryeprokurorja Marku tha se një numër çështjesh kanë karakterin hetimor në të dy vendet, në Itali dhe në Shqipëri, pavarësisht se jo me grupe të përbashkët. Ajo shtoi se rëndësi në këto hetime, ka përgjigja e shpejtë nga Italia për një numër letër-porosish të dërguara për t’i hapur rrugën ecurisë dhe përfundimit të tyre në Shqipëri.
“Ne e dimë që na pret një punë e madhe. Ka studime për grupet e krimit të organizuar në Shqipëri dhe punohet në vazhdimësi për të kuptuar formën, strukturimin, nivelin dhe shkallën e organizimit”-shtoi zonja Marku.
Bashkëbiseduesit vërejtën gjithashtu domosdoshmërinë e hetimeve sa më të thella për të zbuluar origjinën e parave që përdoren nga grupet kriminale.
Prokurori Italian i Antimafias Federico Cafiero De Raho tha se krimi nuk përdor më armët, por paranë duke u shtyrë në lidhje me ndërmjetës në shumë fusha të shoqërisë.
Prokurori i Antimafias theksoi ndërkaq se krimi vepron gjithnjë më shpejt dhe duhen marrë masat pas çdo hetimi të përfunduar me metodat më bashkëkohore të hetimit.
Kryeprokurorja Marku theksoi gjithashtu se pavarësisht se strukturat janë të përkohshme deri në krijimin e SPAK-ut, puna nuk do të rreshtë për hetimin e krimit dhe korrupsionit.
Znj.Marku shtoi se marrëveshja italo-shqiptare mes prokurorive e vitit 2014, duhet rinovuar për të përcaktohuar bashkarisht pikat e kontaktit dhe për shkëmbyer informacionet.
Ndërkohë që Drejtuesi i Prokurorisë për Krime të Rënda, Besim Hajdarmataj shtoi se tashmë ka materiale të përgatitura për t’u shtruar në bisedime me palën italiane, siç është vepruar në shumë raste, me prokuroritë në Bari, Ankona, Leçe.
(E.L/Faxweb)
Discussion about this post