Kreu i opozitës Lulzim Basha, i ftuar mbrëmjen e sotme në emsionin “Opinion” të gazetarit Blendi Fevziu, zbulon se përse në ditën e caktuar për negociatat me Ramën, nuk kanë qenë në një tavolinë.
Basha shprehu se takimet ishin planifikuar të veçanta që në fillim, pavarësisht se kryeministri Edi Rama ka deklaruar të kundërtën një ditë më parë, kur tha se kreun e opozitës e gjeti në dhomën tjetër.
“Edi Rama gënjen, unë e di ça ka thënë por gënjen, nuk kishte takim mes meje dhe Ramës, është informuar Rama që në fillim se është thirrur në një takim të veçantë me Fleckenstein dhe Vlahutin , ndërsa unë isha thirrur në një takim të veçantë me McAllister. Ai ishte ndërmjetësuesi.
Takimet ishin të planifikuar të veçanta, i pari ka mbërritur Rama, unë kam shkuar pas tij dhe jam futur në dhomën e takimit. Këto janë të gjitha mashtrime, nuk pati dakortësi sepse ishte Rama që nuk pranoi qeverinë teknike.”, deklaron Basha.
Negociatat e së martës mes Ramës dhe Bashës, të ndërmjetësuara nga eurodeputetët Knut Fleckenstein dhe David McAllister, ku ishte i pranishëm edhe kreu i Kuvendit Ilir Meta dështuan. Kjo sipas PD-së sepse Rama nuk pranoi qeverinë teknike. (D.D/Shuplaka)
