E kanë refuzuar tre herë, pse këmbëngul Edi Rama që të çojë në Strasburg ish-gjyqtarin e Kushtetueses?!

Ditën e sotme në media janë publikuar emrat e tre kandidatëve që Shqipëria ka propozuar për vendin vakant në Gjykatën Europiane të të Drejtave të Njeriut (GJEDNJ).

Një prej emrave nuk është i panjohur, është ai i Sokol Berberit, i cili është propozuar dhe tre herë të tjera më herët nga ana e qeverisë shqiptare për këtë pozicion. Për t’u theksuar është dhe lidhja e tij familjare me qeverinë Rama, pasi Berberi është kunati i ministrit Xhafaj.

Nuk dihet se pse qeveria e Ramës këmbëngul te ky emër pavarësisht refuzimit tre herë më herët për të, duke u nisur nga vendimi i fillimit të 2017-tës.

Berberi ka qenë anëtar i Gjykatës Kushtetuese (prill 2007 – shtator 2016), mbajtës i titullit “Doktor”, profesor në disa disiplina të së drejtës, kontribuues në përafrimin e legjislacionit shqiptar me Konventën Evropiane të të Drejtave të Njeriut etj.

Një nga kriteret që kandidatët duhet të plotësojnë është ai i Vetingut, që asnjë nga tre propozimet nuk e ka kaluar procesin derimë tani.

Nga ana tjetër në një nga vendimet e dhëna më herët për Berberin, ku refuzohej emri i tij thuhej: Jo të gjithë kandidatët janë mjaftueshëm të mirëkualifikuar, komiteti rekomandon që lista të refuzohet nga asambleja dhe qeveria shqiptare të paraqesë një listë të re kandidatësh.

Dy emrat e tjerë të propozuar janë:

Darian Pavli – jurist me 15 vjet përvojë në disenjimin, koordinimin dhe zbatimin e aktiviteteve që promovojnë mbrojtjen e të drejtave të njeriut në Nju-Jork, Tiranë (Open Society Justice Initiative, Human Rights Ëatch), përfshirë rajonin e Këshillit të Evropës, ekspert ligjor pranë EURALIUS V, këshilltar i Komisionit të Posaçëm Parlamentar i Reformës në Drejtësi, përfaqësim të disa çështjeve në GJEDNJ.

Marjana Semini – juriste me përvojë të spikatur në fushën e së drejtës; mbajtëse e titullit “Profesor i asociuar”, profesore e brendshme në Shkollën e Magjistraturës për 20 vjet dhe drejtore e saj (2009-2013), eksperte e lartë e Komisionit të Reformës Ligjore, si dhe e organizatave të huaja (USAID, BB, UNESCO, BERZH etj.), specializime për të drejtat e njeriut, autore dhe bashkautore e disa botimeve.

(E.K/FAXWEB.AL)