I ftuar në studion e Fax News këtë pasdite ishte gazetari i njohur sportiv dhe “Mjeshtri i Madh”, Moisi Dalipi. Për Albi Rakip, ai foli për suksesin e kombëtares shqiptare, që me barazimin e marrë dje në Moldavi siguroi një biletë për Euro 2024.
Dalipi u shpreh se e përjetoi me emocion suksesin e djeshëm. Sipas tij është fryt i një pune disa-vjeçare, falë trajnerit, lojtarëve dhe stafit të Federatës.
Moisi Dalipi: E përjetova me emocion. Fryt i një pune disavjeçare, punë këmbëngulëse e trajnerit Sylvinho, lojtarëve, stafit të Federatës, të cilët mundësuan që Shqipëria të jetë për herë të dytë pjesë e një eventi të tillë. Tashmë ekipi ynë përfaqësues e ka futur Shqipërinë përsa i përket futbollit në Bashkimin Evropian.
Nga ana tjetër u shpreh se mbrëmë kombëtarja u fut për të fituar, por Moldavia është një skuadër e fortë. Ekipi ynë e nënvlerësoi disi, megjithatë nuk ishte atmosfera si në ndeshjet e “Air Albania”.
Moisi Dalipi: Sporti i bashkon njerëzit, i fisnikëron. Skuadra u fut për të fituar. Moldavia brenda ka rrahur edhe polakët. Një skuadër e formatuar me futbollist me moshë të re. Vendi i vogël por luajtën një futboll shumë të madh. Ekipi ynë e nënvlerësoi diçka, megjithatë ishim në fushë të huaj. Nuk është si ambjenti në “Air Albania”. Impenjimi maksimal, por në disa momente la për të dëshiruar.
Nuk është pak ky sukses, shprehet Dalipi dhe vlerësoi gjithashtu edhe lojtarin Seferi, që në fillim shumë kritikë nuk besuan në të, por tani po e justifikon vendin e formacionit.
Moisi Dalipi: Nuk është pak, është sukses i merituar. Neve i patëm rastet për gol, goditëm traversën me Seferin. Kundërshtari ishte i motivuar. Dhanë shpirtin në fushën e lojës.
Ishte momenti i dëshiruar. Seferi një futbollist, të cilin Sylvinho e aktivizon nga fillimi, di të kthehet prapa në mbrojtje.
Discussion about this post