E kishte marrë e ëma me vete në punë, 4-vjeçarja shqiptare humb jetën në hotelin grek

Një ngjarje e rëndë ka ndodhur në ishullin Naksos të Greqisë, ku një vajzë katër vjeçare nga Shqipëria ka humbur jetën.

Ajo është mbytur në pishinën e hotelit ku punonte e ëma e saj, në fshatin turistik Mikri Vigla, raportojnë sot mediat greke.

Duke mos pasur se ku ta linte, nëna e kishte marrë me vete Katerinën 4-vjeçare, dhe po hekuroste në lavanterinë e hotelit.

Siç raporton portali “naxosnews.gr”, në një moment vogëlushja u largua. Kur e ëma e pa se mungonte kishin kaluar 10 minuta.

Gruaja nisi të kërkonte vajzën e vet dhe më në fund e gjeti përmbys, pa ndjenja, në pishinën e hotelit.

Menjëherë u lajmërua ndihma e shpejtë që mbërriti brenda pak çastesh dhe vogëlushja u dërgua në spitalin e ishullit, por ishte vonë.

Policia ka arrestuar pronarin e hotelit, me akuzën se nuk kishte marrë masa sigurie për pishinën. Më herët ishin shoqëruar edhe prindërit e vogëlushes, por shpejt u lanë të lirë.

Ngjarja ka shokuar gjithë shoqërinë e ishullit, ku familja shqiptare jetonte prej vitesh.

(E.K/FAXWEB.AL)